Povver tocht veur K6

Povver tocht veur K6

n Week of wat leden vruig Arjan of der nog es n keer n Roomhoorntjestocht kon worden organizeerd.

Gain perbleem zee ik tegen hom. Noadat we t der zo es over noadocht haren, kregen we t idee om inploats van roomhoorntjes povvert te moaken. Arjan weer bèld en dit tegen hom zègd. n Doatem was snel vonden, de 25e van juni.

In t begun laip t nait zo störm mor t was ook ja nog n week of wat. Bakker Bert ook intussen al even bèld en dij wol ook wel weer helpen. De 25e kwam dichter bie en Arjan zat al op dik 50 man/vrouwlu.

Ook de jonges van de Sundayboys waren van de tocht op d’hoogte en haren touzègd dat ze ook kwamen.

Guster kreeg ik een appje van Arjan, dat der waren n 70 dij zok opgeven haren. Mit de jonges van de Boys der bie gingen we oet van n 90 man. Dus ik kon aan de slag. Zestien povverts haar docht, verschillende soorten want den is der veur elk ja wat. Al zeg k t zulf, ze waren goud lukt en kon t feest wat ons betreft begunnen. Intussen haren Bert zien Bianca en Yvonne van Wilco en onze kinders touzègd om te helpen. Arjan haar intussen nog n appje stuurd of t apmoal wel goud kwam want der mozzen ja wel hail veul povverts bakt worden. Gain paniek Kuupertje, alles in de macht hier.

Vanmörgen al optied de boudel kloar zetten, de vrouwlu en onze kinder waren ook mooi op tied.

Net alles boeten, n plomp wotter, dat leek nait best. Boudel mor eerst weer in de garage zet, totdat t weer beter werd. En dat gebeurde dus ook.

Sundayboys waren as eerste en haarn ook n beste buië op de kop had en waren verkleumd. Dus de kovvie en povvert ging der in as t bekende woord in n òlderling. Toun zai de kovvie op haren ging t zo snel meugelek op hoes aan. K6 kwam in twij groepen en haren bienoa gain regen had. Ook hier ging t meroakels mit t oetdailen van de kovvie en povvert. n Smak volk t der west, k wait nait percies houveul (n m/v of 85 Henk red).

Ook de opbrengst was dik veurmekoar zodat elk tevree was. Wie, de families Beertema en de Broesders werden nog even bedankt. Mor aigenlieks mouten we joe ook bedanken want zunder joe gain povverttocht en dus gain mees veur K6. Dus willen wie joe bedanken dat je mit zoveul der west binnen. En wel wait wat of der nog in t vat zit.

t BMW

(Proatjeboksem Henk Broesder)